اوطان للايجار وشعوب للبيع
معايا حكام عادة
ولوكس
وملوك بتجرجر فى البوكس
وعمم وطراطير وطواقى
بخلاء وحاتم مش طائى
دقون لطاف ودقون بتعض
وجنرالات شنباتها تخض
معايا ناس زى الفل
مستأنسة وادمنت الذل
معايا تابلوة للفنان
عيزرا شيمون اسحاق ديان
تابلوة لاشخاص سمر وبيض
ينفع على حيطان المراحيض
حكام عرب ضاربين سلامات
ومشمرين البنطلونات
ومشلحين الجلابيات
حاضنين جزمهم تحت الباط
بيخوضوا فى دم الاطفال
من مسلمين او من اقباط
بيقولوا قدام الكاميرات
مافيش حلاوة من غير نار
ما فيش سلام من غير اضرار
ونحن نوصى بضبط النفس
انا بابيع الساكسونيا
كراكيب فى صندرة الدنيا
واللى مايشترى يتفرج
الاراجوزات هنا بتهرج
بتشدها خيوط وهمية
والدم سايل حنفية
للشاعر
عمرو حسنى
نشرت فى جريدة الدستور
يوم
6.12.1996
posted by adhm @
12:48 PM
>Comments: 6
